(Lucas, Es 2. Kapitel)

An selli zeit hott da Kaisah Augustus en gebott naus kshikt es awl di leit in di veld sella gnambaht sei.

Dess voah’s eahsht mohl es di leit so gnambaht voahra, un’s hott blatz gnumma vo da Cyrenius govvenah voah funn Syria.

Un alli-ebbah hott sich grisht un is in di shtatt ganga funn sei foaheldra.

Un da Joseph is aw nuff ganga funn di shtatt, Nazareth, im land Galilaya zu di shtatt, Bethlehem, im land Judayya. Dess voah di shtatt fu’m Dawfit. Da Joseph is datt hee ganga veil eah fu’m Dawfit sei nohch-kummashaft voah.

Eah is datt hee ganga fa sich nambahra lossa mitt di Maria vo fashprocha voah zu eem, un see voah uf fem family vayk.

Un diveil es si datt voahra, is di zeit kumma es di Maria iahra kind havva hott sella.

No voah iahra eahshtah boo geboahra zu iahra, un see hott een in vindla-duch gvikkeld, un hott een in en foodah-drohk glaykt, veil’s kenn blatz may voah im shlohf-haus.

Un in selli landshaft voahra shohf-heedah draus im feld am iahra shohf-heeda deich di nacht.

Un’s is en engel fu’m Hah zu eena kumma, un’s heilich licht fu’m Hah hott um si rumm ksheind, un si henn sich kfeicht.

No hott da engel ksawt zu eena, “Feichet eich naett, fa ich bring eich goodi zeiya vo eich froh macha zayla, un vo zu awl di leit kumma zayla.

Fa zu eich is heit da Heiland geboahra vadda in di shtatt fu’m Dawfit. Eah is Christus da Hah.

Un dess zayld en zaycha sei fa eich: diah finnet’s kind eigvikkeld imma duch un am imma foodah-drohk leiya.”

Un uf aymol voah en grohsi drub anri himlishi engel bei demm engel un si voahra am Gott lohva un henn ksawt,

“Grohsi eah sei zu Gott im haychshta, un fridda un di eaht unnich mensha, dee vo eah froh is mitt.”

Vo di engel si falossa hen un viddah zrikk in da Himmel ganga sinn, henn di shohf-heedah ksawt zu nannah, “Vella nivvah an Bethlehm gay un dess sayna vass da Hah beckand gmacht hott zu uns.”

No sinn si kshvind ganga un henn di Maria un da Joseph kfunna, un datt voah’s kind am leiya im foodah-drohk.

Vo si een ksenna henn, henn si fazayld vass eena ksawt gvest voah veyyich demm kind.

Un awl dee vo keaht henn difunn, henn gvunnaht veyyich demm es di shohf-heedah eena ksawt henn.

Avvah di Maria hott awl dee sacha in meind kalda, un hott hatzlich drivvah gedenkt.

No sinn di shohf-heedah viddah zrikk ganga, un henn Gott glohbt un gedankt fa alles es si ksenna un keaht henn, un fa dess vass eena ksawt voah.

***

Es Nei Teshtament

Committee for Translation, Sugar Creek, Ohio

(Luke 2:1-20)

And it came to pass in those days, that there went out a decree from Caesar Augustus, that all the world should be taxed.

(And this taxing was first made when Cyrenius was governor of Syria.)

And all went to be taxed, every one into his own city.

And Joseph also went up from Galilee, out of the city of Nazareth, into Judaea, unto the city of David, which is called Bethlehem; (because he was of the house and lineage of David)

To be taxed with Mary his espoused wife, being great with child.

And so it was, that, while they were there, the days were accomplished that she should be delivered.

And she brought forth her firstborn son, and wrapped him in swaddling clothes, and laid him in a manger; because there was no room for them in the inn.

And there were in the same country shepherds abiding in the field, keeping watch over their flock by night.

And, lo, the angel of the Lord came upon them, and the glory of the Lord shone round about them: and they were sore afraid.

And the angel said unto them, Fear not: for, behold, I bring you good tidings of great joy, which shall be to all people.

For unto you is born this day in the city of David a Saviour, which is Christ the Lord.

And this shall be a sign unto you; Ye shall find the babe wrapped in swaddling clothes, lying in a manger.

And suddenly there was with the angel a multitude of the heavenly host praising God, and saying,

Glory to God in the highest, and on earth peace, good will toward men.

And it came to pass, as the angels were gone away from them into heaven, the shepherds said one to another, Let us now go even unto Bethlehem, and see this thing which is come to pass, which the Lord hath made known unto us.

And they came with haste, and found Mary, and Joseph, and the babe lying in a manger.

And when they had seen it, they made known abroad the saying which was told them concerning this child.

And all they that heard it wondered at those things which were told them by the shepherds.

But Mary kept all these things, and pondered them in her heart.

And the shepherds returned, glorifying and praising God for all the things that they had heard and seen, as it was told unto them.